挑戰行山100公里!吳業坤踩屎險跌落坑渠

2021年12月03日 21:01
東網電視
更多新聞短片
藝人方紹聰(奶仔)之前曾花6日5夜行均全港一圈,為慈善機構籌款,近日他第3度參與樂施會毅行者,並找來同屬行得之人兼其中學同學吳業坤,一齊組隊挑戰100公里行山大賽。他們在比賽期間遇上氣溫驟降,沿途溫度只有7、8度,當他們到達山頂時大風到企不穩,體感溫度只有2、3度,他們衣衫單薄,穿着短袖運動衣、風褸及短褲,全靠意志撐過去,最終以34小時48分鐘完成賽事。
奶仔透露今次跟隊友們出錢出力,現時籌得萬多元,他們由西貢開始行到元朗,沿途穿過香港及九龍大部分的山,講到難忘事,他說:「最深刻係好眼瞓,因為當日要拍嘢,我朝早7點已經起身,跟住由夜晚9點開始行咗30幾個鐘,差不多50幾小時冇瞓,雖然其他隊友比我瞓得多,但去到最後階段,其實所有人都係好迷迷糊糊咁行,吳業坤差啲跌落坑渠,有幾段路係我恰埋眼,佢捉住我對手行,跟住到佢恰埋眼,我帶佢行。」
全男班參加比賽
除了跌落坑渠,奶仔大爆吳業坤踩屎,認真狼狽:「佢買咗隊新鞋諗住精神奕奕咁去參賽,點知一來就踩屎,佢唔係踩,係踢咗落去。」他覺得最難得是辛苦完,大家行到終點仍識得笑。問到為何邀請吳業坤一齊比賽?他解釋說:「我同佢係好朋友,而且佢之前喺日本行得好勁,要行100公里唔簡單,今次過程絕對增進感情,大家共患難30幾個鐘頭,乜都傾晒。」奶仔之前成立了一個行山隊伍Gang Hike,經常相約一班志同道合的人行山,他說:「我哋有唔同組別,有悠閒組、高級組,希望將來可以搞慈善行山比賽就好圓滿。今次參加比賽係全男班,因為時間比較倉促未搵到女仔,而且好少女藝人可以捱到幾10個鐘。」