被爆貪靚︱冼靖峰同何晉樂做乜玩HeHe？

《聲夢傳奇》一班學員，晚上（3日）在鑽石山宣傳校園歌舞劇《青春本我》，冼靖峰（Archie）對於貪靚一面被搬到角色上，他笑說：「個個都貪靚，純粹只係將呢部分放上銀幕，角色仲有其他元素嘅。」他又透露劇中與何晉樂（Rock）有「親密行為」：「拍嗰陣我哋都有啲係冇跟劇本，都係自己玩吓玩吓咁，但係可能我哋好friend，化學作用導演都話好，係佢哋想要嘅嘢，希望大家會鍾意。」

他又指劇集最難忘的反而不是拍攝，而是劇集的主題曲，他說：「劇集主題曲《青春本我》係同Rock合唱，錄音都冇太大感覺，有日音樂總監Johnny Yim話主題曲歌詞第一句『We have it all』原本係『We had it all』，後來改咗，首歌依家係講現在所擁有，但佢話20年後我哋再唱已經變成我哋15位學員嘅共同回憶，原來首歌有咁嘅訊息，聽到真係好大衝擊，但係依家聽都仲未有靈魂，可能過5年、10年、20年到時會喊住唱。」