「龍虎豹」鬥換裝　容祖兒太性感要遮住咪咪？

「英皇龍虎豹」容祖兒（Joey）、蔡卓妍（阿Sa）及鍾欣潼（阿嬌）近日忙於為主持節目《因為是朋友呀》落力宣傳，呢日佢哋就不約而同，各自拍片大玩變裝，走入升降機，一秒轉新Look！其中Joey最有驚喜，由一開始嘅大褸造型，搖身一變換上七彩Deep V連身裙，不過唔知係咪太性感嘅關係，Joey竟要後期加工，貼上心心圖案符號遮住「咪咪」，令人充滿遐想。

至於阿Sa都唔輸蝕，入lift後換成全黑型格造型，黑皮褸配黑色短裙，再配搭黑色長靴，大玩「絕對領域」。但阿嬌就反傳統，由起初嘅短袖夏日Tee，換成超臃腫毛毛外套，愈着愈密實，輸晒畀兩位好姊妹。