急流勇退？人氣王姜濤驚爆29歲退休移民大計

MIRROR人氣王姜濤紅出國際，近日佢接受美國華語節目《偶像名人堂》訪問，重提早前壓力爆煲出現情緒問題，佢坦言曾經不適應排山倒海嘅工作，幸得公司悉心照顧，學懂轉變心態，將工作當成娛樂，逐漸克服，不過就驚爆計劃29歲就會退休並移民到外國：「我最近先同我阿媽講，我決定咗我29歲要退休呢件事。我係有諗過移民外國，一定要去一次紐約。」

而早前傳曾暗戀《全民造星Ⅳ》參賽者姜咏鑫（Ada仔）嘅佢，就自爆擇偶條件：「一年前你問我呢個問題，我會話一定要長頭髮、肥肥哋，或者點樣。而家嘅我嚟講，冇乜要定個乜嘢標準。鍾意嘅人，唔係話佢要咩標準。如果你鍾意一個自己標準嗰個人，你要問下自己係咪真係鍾意。如果你係因為呢啲條件去鍾意一個人，我唔覺得呢個係愛情。我唔會畀自己有任何嘅嘢去框住。」