「翻版謝嘉怡」J Lou反串扮男人　激發演戲心

同前港姐冠軍謝嘉怡（Lisa）撞樣嘅混血網紅J Lou（林欣）簽約經理人公司，宣布正式進軍娛圈後機會不斷，最近被邀擔任網上平台頒獎禮的主持，同場跟歌手鄭欣宜開心合照。J Lou說：「以前讀中學、大學時，學校問邊位同學想做主持，我都會好主動咁舉行話想試吓，今次都算係第一次正式做主持，因為呢個頒獎禮喺香港係第一次舉辦，感覺好好玩，因為喺頒獎禮條片度，我要扮有鄉下音嘅男人嘅，變短髮又要黐鬚，我都覺得自己扮得幾似，聽到外面反應好好都開心，就係呢次新嘗試，激發咗我嘅演戲心，好想試吓唔同嘅角色。」

以往J Lou上載社交平台嘅短片以搞笑為主，曾扮演過媽咪、便利店員等角色，喺未來的日子，佢就想試唔同嘅新事物，好想拍吓電影、參演綜藝節目咁，或好似閨蜜Lisa有機會拍劇集：「我想挑戰啲正經啲嘅角色，畀人睇吓我嘅另一面。」由於對演戲好有興趣，最近佢忙為自己平台拍片外，亦頻頻參加電影casting，佢話：「希望可以好快有好消息啦。」