陳瀅大戰劉佩玥　港版《Penthouse》有得做？

韓國話題劇《Penthouse》做足3季，次次都大收旺場，9月先播完《Penthouse 3》大結局，大家未回味完，估唔到咁快就傳出無綫有意翻拍做新劇！消息指曾志偉屬意搵「外援」葉念琛做導演，開拍女仔復仇、鬥爭嘅故事，現正於構思階段，更有心想搵上位花旦陳瀅、劉佩玥、蔣家旻及蔡潔做4大女主角，增加新鮮感。

其實該劇仲有馮盈盈，早前東網已率先爆佢同方力申、陳瀅接拍葉新劇，當時盈盈事前話唔會同小方演情侶。被指有份參與該劇嘅蔣家旻，接受東網訪問時話尚未正式收到通知，但得悉葉念琛將執導無綫劇大感高興：「畢竟喺2012、13年嘅時候，導演係畀咗我首次拍電影嘅機會，但之後好多年都仲未有機會合作，所以希望今次可以合作到。」至於劉佩玥接受訪問時坦言有聽過消息，但就未有收到公司嘅正式通知，未知道確實劇情內容同埋角色會甚樣安排，佢話：「如果消息係屬實嘅話，對呢個合作同新嘗試係感到非常期待，所以依家我首先要拍好手頭上套劇，之後嘅工作就等公司好好安排啦！」