張敬軒紅館跨年騷再加開三場 自爆最大敵人係手機?

20211206
東網電視
更多新聞短片
歌手張敬軒勢如破竹,今日(6日)正式宣布假紅館舉行的跨年《The Next 20 Hins Live in Hong Kong 張敬軒演唱會》,再度加開最後三場(1月13、14、15日),終極加開到18場,加場門券將於本月8號於網上發售。軒仔今年無論歌曲,網上平台節目、廣告及參與的電視台節目等大受歡迎,慶祝入行20周年演唱會,早前一開加到15場破其個人紀錄,還滿足不到樂迷需要,據演唱會總監馮貽柏表示,今次再度加場是幾經辛苦爭取所得,感謝紅館對軒仔支持,希望一直買不到飛的歌迷把握最後機會,因該三場真的是終極加開。
對於個唱添食加開,軒仔先多謝樂迷支持,自感有能力就盡量唱多少少,免令歌迷失望: 「好多人向我申訴買不到飛,最近仲收到歌迷PM,指買飛遇上騙徒呃錢,所以公司同我研究加場,我考慮過自己體力、工作上調配是否可以等等問題後,真心希望可以幫到歌迷朋友,等佢哋可以有再買飛嘅機會,先答應加場。有歌迷朋友同我講,有人冒稱係贊助商,話可以代買演唱會飛,但當大家畀錢之後就聯絡唔到,損失慘重。我真係再勸喻大家多一次,千萬唔好同啲不明來歷嘅人買飛,唔好受騙。」
現在演唱會加開到共18場,軒仔的歌首首都出名唱到飛天遁地,非常人可駕馭。問到如何保持體力應付18場騷,他謂:「最近非常之咁保重自己身體,天氣轉冷不敢怠慢,唔想病倒影響工作,我有專業團隊照顧我聲帶健康,聲樂老師同照顧我聲帶嘅醫生商量過,得出嚟嘅專業建議,係吩咐我唱5日休2日係最好,咁樣聲帶就可以得到最佳狀態,所以公司一早就已經按照呢個專業意見去規劃我整個演出,相信我可以得到最佳休息。依家我唯一敵人就係部手機囉,哈哈,大家都知我有『手機成癮症』,成日一睇就唔知點解又天光,演唱會期間真係要戒,戒唔到點算?或者可能真係要搵人係演唱會收工之後,收走我部手機,咁我先可以早瞓。」