猜包剪揼輸咗！張天賦隊20杯酒找數

華納歌手MC（張天賦）、人氣男圑MIRROR成員Edan（呂爵安）及環球歌手曾比特（Mike）都係今年男新人獎頂頭大熱，MC嘅新歌《記憶棉》雖然喺商台播放率已「夠數」，但依然入唔到903專業推介榜，所以被傳遭電台打壓。MC啲粉絲就好擔心佢會因為呢件「不平事」而唔開心，但係事實又唔係大家想像中咁喎，佢仲有好心情同班Friend落酒吧玩添。

喺網上流出咗條「MC張天賦好飲得」嘅短片，見佢單手攬實一個着黑色衫嘅男仔，仲對住鏡頭好肉緊咁，雙手搣嗰個男仔塊面珠，之後鏡頭一轉，就係成班人伸隻手出嚟玩包剪揼，點知人哋出揼，MC就出剪，佢啲Friend開心到攬埋一舊，而輸咗嘅MC就速逃，有人大叫：「喂，找數呀！」原來佢輸咗成支酒，但唔係要佢畀錢，而係要飲晒支酒，係一支可以倒滿20個杯嘅酒，今次真係不醉無歸。