華燈初上︱林心如跟「媽咪」學嘢　點火都係學問

台灣劇集《華燈初上》Hit爆港台，當中主演林心如同楊謹華更加係大殺四方，被大讚高度還原台灣80年代的日式酒店背景，點都估唔到佢哋原來都可以做到極致「媽媽桑」Feel。最近二人接受訪問時，就稱演員們喺開拍前，曾前往現實生活中嘅酒店討教7大細節，包括使用打火機方法、返工前睇報紙等小動作，事前準備工作相當用心嚴謹。

兼任主演及製作人嘅林心如透露，眾女開拍前齊齊去咗一間開咗20幾年嘅日式酒店，向媽媽桑討教對客、待客之道，以及店內相關規矩，佢哋唔只要學日文、插花、睇報紙，就連倒酒、摺毛巾、點打火機嘅方式都好講究。林心如即場示範點火，指因為擔心會令客人受傷，因此一開始手勢要壓低，等到順利點燃打火機之後再轉正拎畀客：「因為怕火會燒到客人眉毛甚麼的。」楊謹華就話酒店小姐同媽媽桑酒量要好好，坐姿亦非常重要：「腳一定要併攏。」邊講邊做，夠晒專業。不過當被問到佢哋學咗幾耐，佢哋就話只係學咗一晚就已經要記到足。