黃嘉雯變西部牛女　興奮攬仔賀28歲生日

前港姐冠軍黃嘉雯今日（7號）28歲生日，尋晚（6號）獲一班圈外好友舉行派對慶祝，同屆港姐蔡嘉欣有份出席。派對dresscode以80年代主題，個個以懷舊造型現身，而壽星女則以粉紅色西部牛女打扮亮相，好有《反斗奇兵》裏面嘅「翠絲」Feel，成為全場矚目。現場布置滿氣球裝飾，加埋Disco波造型蛋糕，相當有儀式感。其中一張相見黃嘉雯興奮攬仔，但嗰個唔係貌似「雷神」嘅外籍男友Matej，咁親密男友會唔會呷醋㗎？

黃嘉雯感性發文，形容好友似《反》裏嘅玩具一樣咁有義氣：「感謝出席既（嘅）每一位寶貝，你哋就好似我反斗奇兵Buddies 入面陪我癲陪我歷險，有事又黎（嚟）救我既（嘅）同伴！雖然我並不完美，但你地（哋）總會接受我既（嘅）缺陷，做我既（嘅）朋友。細個每年生日總會有好多感受，但當人大左（咗），開始覺得只要身邊仲有錫你既（嘅）人，你Care既（嘅）人係身邊已經足夠。肉麻野在心中，我衷心希望你地（哋）幸福快樂，我就快樂，I Love You All。」