楊千嬅全家移居上海　Torres讀學費28萬頂級學府

近年轉戰內地市場嘅藝人楊千嬅，2019年攜老公丁子高參加內地真人騷《妻子的浪漫旅行3》後，二人就長時間留喺內地做嘢，以往千嬅工作完就返港休息，仲可以見到9歲仔仔Torres，不過依家工作量大增，加上受不可抗力影響，千嬅為咗唔使同Torres分隔兩地，早喺今年4月份時佢哋已經全家低調移居上海。

早前千嬅上載同阿仔一齊隔離嘅Vlog，當中就提到感覺好唔一樣，因為可是同Torres好接近咁交流，仲每日24小時互相觀察，彼此更了解對方。而去到7月丁子高42歲生日，佢又上載全家福，並寫道：「有地方可去就是家，有愛的人就是家庭，兩者兼得是一種幸福，我愛你們兩個。」早已透露移居嘅決定。

據知，Torres依家正就讀當地頂級學校，該校師資優良，教育模式新穎，喺全球都有知名度，根據學校收費表顯示，小學一年級到四年級一年學費就係28萬人民幣（約34.28萬港幣）左右，價格高昂。

對於移居上海一事，千嬅受訪時表示：「唔係移居，我屋企都係香港，所以會返嚟嘅，因為喺內地接咗一啲工作，會照計劃完成佢。（帶埋個仔同老公去內地？）丁生香港有公司，會兩邊飛嘅，個仔梗係留喺身邊，唔想長期分隔異地，會好掛住，所以暫時喺內地返學先。（點解揀上海？）丁生家人喺上海，方便照應嘛！」