炎明熹恨有男友聖誕打卡　孖Chantel Yumi合照當圓夢

無綫「聲夢4小花」炎明熹（Gigi）、姚焯菲（Chantel）、鍾柔美（Yumi）及詹天文（Windy）齊齊出席商場活動，置身逾5米高的巨型聖誕扭蛋樹及逾20米長的光影隧道中，4小花即瘋狂打卡狂影靚相。

行型格路線的三料冠軍Gigi話最愛掛滿紫色燈飾的20米長光影隧道，雖然零戀愛經驗，但依然有顆少女心的她說：「呢度最啱情侶打卡，雖然我仲未搵到男朋友，但好在仲有3個《聲夢》姊妹陪伴，仲幫我影咗好多靚相添。」

至於「國民初戀」Chantel就抱着霓虹燈牌，甜美笑容散發出陣陣「仙氣」，得悉現場設有DIY夢幻糖果吧，為食的她嚷着要夾糖，她解釋：「我想整嚟聖誕送畀朋友啫，相信見到咁多色彩繽紛嘅糖果，加埋我設計嘅包裝，收到嘅人都會特別開心！」童星出身的Yumi舞台經驗十足，面對鏡頭秒速「超模」上身，連環擺出多個靚Pose，之後又親自操刀幫大家影相，仲化身「小導師」教Windy擺出顯瘦長腿Pose。