燈牌海成人氣之爭 MIRROR騷變「女友」專場

2021年12月08日 11:02
東網電視
更多新聞短片
人氣男團MIRROR「半塊鏡」姜濤、Jer、Edan、Anson Lo、Ian及AK,一連兩晚的會展騷昨晚(7日)頭場,姜媽、Anson Lo父母及家姐、鄭欣宜(Joyce)、馮允謙、「折骨Ben」趙祥誠、Jeffrey及女友等現身支持,現場坐爆「鏡粉」,氣氛熾熱!期間Joyce上前跟Anson Lo父母打招呼兼影合照,猶如見家長般,十分爆笑!
甫開騷全場熄燈之際,「鏡粉」默契十足,舉行「亮燈」儀式,形成「燈牌海」甚為壯觀!打頭陣先派出型爆AK,大騷麒麟臂連唱快歌《黑之呼吸》及台灣天團五月天的《離開地球表面》炒熱氣氛,打招呼時他表示今次個唱紀錄了他們6人的成長,介紹《離》又打趣笑話:「跟住會唱首關於地球嘅歌,最近有首地球(《倒轉地球》)好Hit,但我唔係唱嗰首,哈哈!」緊接孖姜濤合唱潘瑋柏的《Coming Home》,以Rap及熱舞炸爆舞台!
Ian、Edan及Anson Lo輪住出場,Edan唱《My Apple Pie》時跟全場Fans大合唱;Anson Lo以一身白馬王子Look由台中升上,以鋼琴處男自彈自唱出《不可愛教主》冧爆Fans!其後Ian再現身孖Jer彈結他合唱Lady Gaga及Bradley Cooper《Shallow》,大騷音樂才華!繼MC(張天賦)日前開騷演唱Jer的《狂人日記》,Jer是次開騷「回禮」揀選對方的《反對無效》,就連衣着都跟MC類同,之後他再由Edan以鋼琴伴奏之下合唱《E先生連環不幸事件》。當「田牧CP」合體時,Fans以尖叫聲歡迎,二人演唱高爾宣《So Bad》,留下來的Anson Lo則再帶來台灣天后蔡依林的跳唱歌《大藝術家》及《我呸》,期間多次自摸胯下,睇到Fans熱血沸騰!唱新歌《Megahit》又帶領全場一齊做副歌Signature手勢「Uh-oh Uh-oh」,臨離台前更送飛吻,相當識做!
除了Edan首唱新歌《一表人才》外,姜濤是晚第一次演唱新歌「第九胎」《鏡中鏡》,帶給「鏡粉」Surprise!繼而他再帶來經典金曲Medley《浪子心聲》、《分分鐘需要你》、《等》及《追》,唱畢他表示是想向多位樂壇前輩致敬:「冇咗佢哋就冇呢個樂壇,其實喺3年前、啱啱出道嗰陣係唔鍾意呢啲歌,因為覺得好老土,但當我入咗行,覺得有呢個責任將廣東歌帶出去,藉住呢首歌話畀年青人聽要向前輩學習,將呢份精神傳承落去。」再講到最近睇過電影《梅艷芳》,故亦揀選對方的名曲《夕陽之歌》,唱完講聲「加油」落台。
首晚嘉賓有樂隊ONE PROMISE結他手天衡,還有MIRROR隊長Lokman,驚喜現身於二樓然後Chok爆扮消防員「瀡」下來,跟AK合唱《虎道門》。去到演唱會尾聲,6子終合體,以唱《Ciao》及《我的快樂時代》完場,場面溫馨!
MIRROR 6子騷後受訪,謙虛自評僅合格分數,未發揮至高水準,望今日(8日)尾場能夠去到盡。談到姜濤首唱新歌《鏡中鏡》,他笑言目的是想睇到大家驚訝表情,問及要演唱前輩們的經典金曲可有壓力?他直言都有:「覺得要唱好佢。(啲金曲推出嘅時候你未出世會難投入?)唔會,我有上網去了解啲歌嘅背後意思、歷史,係我嘅責任。」而重提他的29歲退休「宣言」,他貪玩話:「其實條片係好耐之前。(依家仲係29歲?)順期自然啦!可能依家變25歲,哈哈!」
Edan亦是首唱新歌《一表人才》,坦言好緊張,因為首歌都有難度,說到他是晚大騷Quali,鋼琴自彈自唱同時又幫兄弟伴奏,是否晒實力?他笑說每次表演都是彈琴擔當,再講到他、姜濤、Anson Lo及AK都挑戰唱Rap,是否要向隊長Lokman挑機?他們即賣口乖笑話不敢當:「佢咁有型!啱啱仲要喺咁高瀡落嚟就知冇得比,佢個指標就係咁高,我哋只係嘗試吓!」
而近日有網民發現某電台疑似打壓MC(張天賦)新歌《記憶棉》,感覺明顯鋪路讓Edan拎男新人金獎,Edan聞言表示有睇到相關報道,但冇留意實情:「大家鍾意自己偶像先有情緒,最緊要音樂好聽,希望多啲人鍾意自己嘅作品,坦白講我都好鍾意MC,之前仲話我同佢似樣,知佢唱歌好叻。」現場記者亦有恭喜6子每人均有一首Solo歌打入《叱咤》「我最喜愛的歌曲」最後15強,團歌更有兩首,共8首作品入圍佔總數一半,「大包圍」成績驕人,AK感謝Fans投票及喜愛,之後會再努力出歌,Ian接話:「好開心見到大家身體力行支持自己,無論邊個歌手嘅歌都好,有大家支持好重要。」
Anson Lo開騷前於社交平台無奈自爆大廈停電冇𨋢,行樓梯行到腳軟,他笑說「教母」一早有溫馨提示,但今朝起身就完全忘記,打趣試探他住幾多樓時,其他兄弟爭住「護草」話要「保護證人」:「其實佢屋企喺地庫!但又好似住二百幾層!」Anson Lo續笑話:「幾廿層啦!都真係腳軟,唔知自己做緊乜。(轉頭返屋企要行番上去?)我真係唔知!我都好驚!」突然想起其父母及家姐都有前來捧場,Edan即抵死笑講:「佢哋都係行樓梯嚟,係好好嘅親子活動!」又問到Anson Lo早前交通意外整親腰部的傷患是否完全康復,全晚表演才能揮灑自如?他派定心丸指有Keep住做物理治療,正在康復中。
除了Anson Lo有家人撐場之外,姜濤都有姜媽捧場,至於近日跟圈外女友Kelly有小爭執的Jer亦大方表示對方都有在場,問到關係是否有好轉?他表示最近忙於籌備演唱還未處理好。而Ian就話同女友Amy Lo(盧慧敏)各有各忙工作,對方未有到場睇騷。