周秀娜天生棚牙唔齊　夠膽滴牙膏落胸唔敢拍露齒廣告

藝人周秀娜與李靜儀今日（8日）出席活動，談及牙齒護理，兩人也表示曾經箍牙，曾拍過滴牙膏落胸寫真的周秀娜説：「當時初入行做Model，本身門牙生得唔夠整齊，所以唔係好敢笑，又好羨慕拍牙膏廣告嘅人啲牙好白好齊，笑容又靚，嗰陣但凡呢啲廣告都唔會揀到我，後來就去箍牙，嗰陣醫生建議我剝埋智慧齒去就番啲位，結果一次過剝咗4隻，當時技術冇依家咁先進，每次食飯前都要整理都有啲尷尬，結果用咗2年時間整番靚，所以依家就好敢笑。」

李靜儀也表示因為貪靚試過兩次箍牙，她說：「讀書嗰陣試過箍牙，嗰陣仲係用鋼箍。（畀人笑鋼牙妹？）又冇乜，因為嗰陣普遍都係用鋼箍，當時一次過剝左4隻犬齒，大個入行之後再箍過一次，嗰陣就用咗透明牙箍，但都要剝左4隻智慧齒，以前係包包面，結果前後剝咗8隻牙，塊面都瘦晒。」她笑稱女人貪靚可以好偉大。問到有否留意有份演出的電影《假冒女團》票房，她指監製一直有更新她，亦期望能開拍第2集。