全新周末早午餐 素VS葷
20211210
東網電視
更多新聞短片
又到周末,想趁機同三五知己或另一半瞓到自然醒才開餐,Brunch絕對係一個好選擇,想食得Chill、歎住食?今日介紹兩個新推出嘅早午餐,一個係素食餐廳供應嘅香檳Brunch、一個係全新Set Brunch,選擇多多,慢慢歎個夠!
素食香檳Brunch
中環人氣素食餐廳酒吧Veda早前進行翻新,今個月以全新面貌登場,廚師團隊以精湛廚藝炮製出散發食材原始味道嘅佳餚,新設烘焙甜點區,供應多款Alive Food精製烘焙食品和糕點,主打本地生產、不含防腐劑和添加劑嘅手工發酵食品。而全新推出嘅周末限定香檳早午餐,大家可以2小時無限暢飲巴黎之花香檳、精選紅白葡萄酒、啤酒和早午餐專屬雞尾酒之餘,還有6道共享佳餚、甜品拼盤及無限量任食印度米漿煎餅(Dosas)。Dosas為天然純素和無麩質嘅印度傳統早餐或午餐食品,餐廳更特別於經典口味入味釀入餡料,打造獨有嶄新餐飲體驗,香脆可口煎餅更可自選搭配4款餡料呢!
法式小酒館風味
早前於將軍澳開業嘅法式薄餅小酒館ANNE,一室布置清新富時代感,深木家具、銅金燈具、白磚牆、藍白相間色調等交織出輕鬆悠閒氛圍。餐廳最近推出全新3道菜早午餐,有餐湯或沙律及甜品,以及自選主菜,當中有不少餐廳招牌薄餅(Classic Crepes)選擇,包括用上炒蛋、黑松露、火腿及埃文達芝士炮製嘅Truffle;用熟火腿、埃文達芝士及太陽蛋製作嘅The Complete等;另有用菠菜苗、煙三文魚、刁草忌廉等炮製嘅Norwegian特色薄餅(Signature Crepes)。喜歡肉食嘅也有牛扒薯條、油封鴨供選擇。