被重提甩裙事件!陳凱詠遭Serrini奉勸:啪實啲鈕

2021年12月13日 08:48
東網電視
更多新聞短片
環球歌手陳凱詠(Jace)於九展Star Hall舉行一連兩場處女賣飛演唱會,昨晚尾場繼續爆滿,獲徐濠縈、Gin Lee(李幸倪)、KB、組合石山街等現身支持。Jace以紅黑配Rock妹Look登場,打頭陣唱出《天生二品》,全場「二品官」(Fans暱稱)即High爆企起身大合唱,連接演唱多首英文歌後,Jace除去外套及短裙,貼身高衩Body suit將其Fit到漏的身段完美呈現,意態撩人獻唱新歌《收聲多謝》,於台上特設的輸送帶同Dancers埋身跳舞,一時碌地、踢腳又擘腿,睇到台下Fans嘩嘩叫!
緊接邀請是晚首名嘉賓出場,孖「陀地歌姬」Serrini合唱《相對濕度》,Serrini搞笑話見Jace有好多小朋友Fans,所以不會亂講粗口,再留下獨唱《~旋轉with me*》讓Jace換衫,她抵死重提對方上次演出甩裙事件:「啪實啲鈕記得!」搞到Jace哭笑不得!下一部分Jace以一身白裙化身俠女表演耍花劍,再隨住吊台上升跟坐於二樓的Fans打招呼。第二位嘉賓是同門歌手Mike(曾比特),「葡萄」表示好羨慕對方可以開到演唱會,希望將來亦有機會開騷。
Jace於情深說話環節大膽爆父母秘密,先由自做歌手後經常做訪問經常提起父母做切入點,還一度講到哽咽:「雖然我染晒金毛,但我係個好傳統嘅人,好重視屋企,而父母一直都好支持我,先可以畀到我咁自由不羈、天生異品,媽咪唱歌好叻,我細個喺幼稚園唱歌啲同學讚好好聽,我就好招積咁話係遺傳媽咪,亦好多謝爸爸喺我由細到大都播麥當娜、關淑怡、杜德偉啲快歌,我就喺強勁節拍下成長,好多謝佢哋!接下來要送首歌(《Hopelessly Devoted To You》)畀你哋,呢首歌係媽咪嘅飲歌,爸爸聽完就展開追求。」此時大會鏡頭影住坐於台下的雙親,Jace媽媽甚為怕醜!
唱作人Jay Fung(馮允謙)擔任第三位嘉賓,二人拖手合唱,Jace亦老實不客氣向對方𢱑歌,意想不到Jay自爆為她寫歌中:「2個月前有日突然喺腦海聽到你把聲,覺得首歌會好啱你唱,會返去完成佢!」Jace感動到即向Jay伸出手:「合作愉快!」
到個唱後段,她換牛仔裝襯Tube Top帶來熱舞,全程氣都唔喘跳唱Medley,將現場氣氛推至最高點!至於唱《Ciao》前,突然有感而發指雖然身邊有好多朋友離開香港移民,但她堅決留守:「同大家一齊見證繁榮同低窪。」Encore時,Jace再換粉紫色超貼身長裙送上首支派台歌《想突然》以及《隔離》,為兩場演唱會畫上句號。
騷後她接受訪問,興奮話慶功要放肆食麻辣火鍋及煎炸食物,問到今次是否最性感一次?她笑話:「都盡盡哋!冇乜嘢可以攞到出嚟,性感呢啲嘢都志不在性感,志在意象夠型!」又自爆表演花劍是出於私心想給Fans驚喜,但亦是令她感最大壓力的項目:「明明係2、3個月前決定要耍劍,最後得5日時間排練!」
講到爆父母拍拖秘密,她笑說開騷前有向父母放風聲話要影相着靚啲:「真係好多謝佢哋,同時想提醒小朋友追夢嘅時候要孝順父母,呢個騷好有教育意義,哈哈!」另外,再談及她於台上提起移民,Jace自爆當年去完美國交流後,曾有想過重回當地做Dancers念頭,但之後因太記掛住香港作罷,不過她慨嘆身邊最好朋友都陸續移民,未能邀請他們欣賞今次個唱好可惜。