詹天文街頭遇襲險受傷　網民陰謀論指係鏡粉所為

《聲夢傳奇》學員鍾柔美（Yumi）、詹天文（Windy）、文凱婷及潘靜文等人昨日（12日）現身尖沙咀快閃跳舞，吸引大批粉絲圍觀，惟表演開始前發生小插曲，Windy喺前往場地途中時竟被女途人迎面撞倒，而呢日有關片段亦喺網上曝光，見當時該位女途人不顧人群，一支箭咁衝向《聲夢》學員，先撞開文凱婷，再成個人撲向Windy，幸得工作人員及時從後保護Windy先冇被撞跌落地，但就嚇到Windy成個人呆晒，唔識反應。大批網民直斥該途人行為唔應該，甚至有人陰謀論，聲稱該途人係MIRROR粉絲「鏡粉」，指佢存心襲擊Windy，不過其他網民就認為該指控並無根據。