偷偷買鑽戒　邱澤最冧許瑋甯每日做呢樣嘢！

40歲台灣男星邱澤因拍攝電影《當男人戀愛時》與37歲許瑋甯相戀，二人喺本月10日宣布結婚，全城祝福。二人婚後首次接受台媒訪問，當中邱澤就自爆偷偷拎老婆飾品去度佢無名指指圍，原來許瑋甯連老公買戒佢都唔知，夠晒驚喜，不過求婚細節佢哋就話暫時保留唔講住，而二人又表示的確有辦婚禮嘅計劃，共識係希望婚禮簡單而溫馨。

講到今次宣布喜事之後，二人電話都被祝福Message炸爆，更搞到許瑋甯電話都Down埋。問到幾時有結婚衝動？邱澤都直認二人已到適婚年紀，彼此都覺得對方「是那個對的人」，所以就結婚，長輩亦唔使再為佢哋終身大事操心，又開口大讚老婆好善良，對長輩非常孝順，兩個人喺埋一齊夠晒安心。許瑋甯亦冧二人日常生活相處，都覺得同彼此喺埋一齊嘅時候好心安，兩個都好珍惜相處的時間，所以就決定嫁人。

邱澤更罕有放閃，自爆依家最幸福嘅一樣嘢，就係每日都可以有人一齊食飯。當提到二人是否雙喜臨門有BB時？許瑋甯即甜爆否認，指後面仲有工作要做，不過都收到晒大家祝福佢哋連生貴子。