已盡力︱周秀娜有信心奪澳門電影節影后

藝人周秀娜（Chrissie）與魔術師甄澤權（Louis）下午（15日）現身海洋公園「好想聖誕2021」傳媒發布會，Louis更即場表演魔術，為海洋公園閃耀的歐陸風聖誕揭開序幕，Chrissie表示自小已喜愛魔術，亦曾於電影拍攝時跟魔術師學習過，談到聖誕將至，她説：「可能都要開工，因有兩套劇要拍，另有部電影因為多動作場面，所以近排都忙住跟動作指導練習。（你腳傷好番？）其實一直都未好過，因為要時間抖，上次教練幫我撳過，話我左膝頭哥有積水。」雖然聖誕要開工，但她開心表示提早收到聖誕禮物，她説：「同阿聰（張繼聰）拍嗰部《馬達·蓮娜》有份角逐今屆澳門國際電影節，呢個月23號就係，好想親身過去。（有份角逐最佳女主角，有冇信心？）信心一定有，係嚟自自己已經盡力做好，同埋對我嘅拍檔阿聰、對劇組嘅信任。」