張崇基張崇德最後一次開騷 重回發迹地
20211216
東網電視
更多新聞短片
![](/hk/bkn/cnt/entertainment/20211216/photo/bkn-20211216200206534-1216_00862_001_01p.jpg?20211216200410)
歌手張崇基及張崇德作客TVB娛樂新聞台節目《StarTalk》,接受主播許文軒(Edmond)專訪,大談將舉行跨年演唱會感受。講到個唱取名「最後的基會難德」,即最後一次開騷,崇德說:「一來阿哥已經移居加拿大,未必下下有機會返香港搞騷,疫情之後有好多嘢更加難估計,而且今次係第10次開演唱會,好似好圓滿咁!」他們亦表示:「最唔捨得係Fans,我哋一步一步行到呢度,有好多Fans第一日已經支持我哋,但佢哋好慘,佢哋以前話畀人知鍾意我哋會畀人笑,我聽到嘅時候好心噏,點解我做歌手,做到鍾意我哋嘅人會畀人笑。」
談到二人做歌手曾被受質疑,崇德說:「唔係質疑,係直頭話我哋唔得,我哋明白做到演唱會嘅歌手係邊種,係有拎歌手獎,有Hit歌,有人氣嘅歌手,但我哋完全冇。但當年2002年,大約20年前我哋做幕後多,同唔同嘅娛樂公司傾,佢哋真係有問我哋有乜Hit歌?有冇劇出?有冇歌上榜?我哋乜都冇,就話咁仲搞咩啫!我哋心裏面有啲唔忿氣,因為之前推出發燒碟,喺冇宣傳情況下賣過二萬幾隻,我哋覺得既然有人聽,即係有人會睇啦!所以決定自己搞。當知道全場爆滿,我哋真係好感動!所以今次最後一次去返伊館呢個發迹地開騷,真係好有意義。」期間二人又互相感謝對方,崇基感觸表示:「多謝上帝畀咗個咁好嘅細佬我,我性格比較浪子,好多時感覺唔係好積極,但細佬一直Push我行,如果唔係佢親力親為落手搞第一次嘅演唱會,我根本冇可能Keep住唱,所以我哋今次會好好珍惜呢次最後嘅演出。」