唐詩詠免疫力差咗　自爆有20幾樣嘢唔食得

陳山聰與唐詩詠今晚（22日）在銅鑼灣出席劇集《隱形戰隊》煞科宴，由眾主角夾份宴客。陳山聰指今次劇集拍得相當辛苦，由開拍籌備、操練、槍械訓練，到完成拍攝足足花了8個多月時間，是拍攝以來最長的一次，雖然拍攝時間長，但亦換來大家有覺好瞓，不用外景接廠景拍攝。

唐詩詠笑謂拍攝去到最後段百密一疏，忙記了與陳山聰還有一場健身場面拍攝，臨尾要再加操，問到可會操上癮？她笑說：「咁辛苦有啲成績，都唔想放棄、依家冇以前咁單薄，手臂仲有老鼠仔添，但係拍完放假都唔願起身跑步，要的起心肝操番。」

唐詩詠面上出了不少粒粒，她說：「呢兩年太過勞碌嘅後果，免疫力降低咗，依家有食物敏感，有20幾樣嘢都唔食得，好似米、豬肉、青瓜等等，由《白色強人II》開始擾攘咗9個幾月，醫生都要叫我唔好再拍劇住，要抖一抖，同公司攞咗半年假好好休息。」陳山聰笑說：「都話你要嫁人啦。」她笑謂雖然開始放假，但手上有4套劇未出街，2022年還有不少存貨可上映，大家還會看到她的作品。