歌手葉巧琳及黃妍今日（22日）到電台出席活動，講到聖誕節將至，葉巧琳表示明年1月1日及2日會到主題樂園演出音樂劇，下星期一開始就會每日練歌練舞，聖誕節期間就好好休息，準備之後的練習，問到男友可會詐型？她笑言：「我詐番佢就啱，佢24號晚要好夜先收工返到嚟，冇得陪我倒數聖誕，不過之後聖誕都可以陪吓大家嘅，但我哋老夫老妻就唔會送聖誕禮物啦。」

黃妍就表示聖誕節會出席活動，亦會到朋友家玩，問到可有男仔約？她大呻沒有，叫葉巧琳介紹男仔給她識？葉巧琳笑言：「我嗰啲係已婚人士啦。」黃妍認為入行後反而更難識到男仔，又話自己是話題終結者：「好怕尷尬。（你個人放開啲？）唔識傾偈，熟咗先傾到，所以隨緣啦。」她亦表示喜歡盧廣仲型的音樂才華男，葉巧琳即笑言要幫她公開徵男友，十分搞笑。