布志綸唔希望囝囝做接班人:做音樂唔容易

20211223
東網電視
更多新聞短片
歌手布志綸(Alan)昨晚(22日)在主題樂園舉行首個個人音樂會,獲陳柏宇、李丞責與太太劉倩婷、劉威煌夫婦、黃妍等人到場支持。他獻唱多首個人作品,亦有唱出Mr.時期創作的作品,包括《黑色狂迷》、《搖擺》,全場high爆!之後他唱到滿頭大汗要除外套,坦言:「玩音樂係漫長兼艱辛嘅路,今日係入行以嚟第一次以個人身份開嘅音樂會。」粉絲叫他「撐住唔好喊」,他即笑言:「汗嚟㗎啫。」然後續謂:「幾年前寫咗首《長路》,點解音樂路咁難行,一、兩年後發覺當年The Beatles都係喺呢個情況下,寫咗首《The Long and Winding Road》,發覺好有共鳴,當然唔係同佢哋比較。」
Encore環節,Alan的5歲囝囝成為特別嘉賓出場,全場歡呼!Alan彈結他、囝囝彈琴,兩父子合作表演《森林》,囝囝信心十足,表現似模似樣,完全沒有怯場。彈完opening的囝囝之後周圍走,Alan即拖住他不讓他走,期間囝囝全程keep住型爆插袋企,十分搶鏡!唱完之後囝囝不肯走,繼續型爆擺甫士,十分搞笑!
騷後受訪時,講到囝囝琴技了得、表演淡定,Alan笑言:「之前都唔知佢咁有表演欲。(裁培佢成為你嘅接班人?)頭先都講音樂路好艱難,最好唔好啦,除非佢嘅天分再高啲啦,做音樂唔容易。(但佢好有音樂天分?)ok啦,佢真係練咗好耐。(點多謝囝囝將第一次上台畀咗你?)佢多謝我就真,可以咁快上台,爸爸都要努力好多年先有得表演。」
講到今次首次舉行個人騷,他笑言覺得chur:「今次極速連住唱落去,唱到聲沙,因為冇間場,歌接歌冇停過,今次係好好嘅經驗。」提到他預告下月Mr.與C AllStar合體開騷,他笑言:「開心呀又有騷玩,下月完全未知係點,因為大家都好忙,都未約出嚟傾細節。(好耐冇合體開騷?)係呀,因為大家都好忙。(佢哋今日冇嚟睇你個騷?)之前都同佢哋講,不過佢哋有人話唔係香港,有啲就話有嘢做嚟唔到,佢哋真係好難約,但我冇所謂嘅,屋企人、朋友支持好開心,有得做騷已好開心。」講到聖誕節,他表示會放假,與家人度過。