同阿Sa玩神同步！阿嬌：羨慕佢有好男友

組合Twins嘅蔡卓妍（阿Sa）同鍾欣潼（阿嬌）出道20周年，情同姊妹，尋日（22日）佢哋喺社交網大晒靚相，睇到佢哋盛裝上陣，同經理人霍汶希（Mani）準備出活動，阿Sa仲罕有晒Deep V騷事業線，相當搶鏡！而佢哋現身紅地氈時，阿Sa同阿嬌大玩「神同步」，佢哋打完招呼之後，唔只一齊將視線望向Mani，仲想一齊遞咪畀Mani！當被問到出道20年有咩想同對方講？佢哋一齊講：「謝謝你！」真係夾都冇咁齊呀！

受訪時，問到Twins20年來，佢哋嘅性格、愛好、生活方式，有受到對方的影響嗎？阿嬌說：「有，我小時候比較內向，不太笑，我認識了她之後我就發自內心的笑出來了，還有受她影響喜歡彩色。」阿Sa就話：「我愈來愈喜歡我的搞笑一面，因為可以氹阿嬌開心。」講到有冇最羨慕對方嘅地方？依家單身嘅阿嬌就話：「羨慕她有一個很好的男朋友（石恆聰），好成功。」阿Sa就話：「羨慕阿嬌360度冇死角，在燈光很惡劣的情況下，她都可以拍得很好看。我跟容祖兒常常為了這個事情很生氣。」