江若琳孖老公吔魚蛋粉慶祝結婚3周年　咩事差啲家變？

藝人江若琳與老公蕭唯展日前結婚3周年，因為老公工作繁忙，最後喺慈雲山一間魚蛋粉麵店食飯慶祝，簡單又貼地。雖然平民化慶祝，但係佢哋嗌到成枱都係嘢食，嚟個魚蛋粉放題！自認零儀式感嘅江若琳，雖然冧話日日都係情人節，但係點知佢竟然連結婚戒指都差啲整唔見，直言差啲家變呀！江若琳喺社交網上載手戴婚戒，留言表示：「終於搵番隻結婚戒指，呢幾日差啲家變。點解會跌左（咗）喺人（地）哋餐廳地下？」嘩，唔係每次都咁好彩，江若琳真係要小心啲喇。