《惡作劇之吻》家族合體　林依晨幸運避過一劫

由台灣女神林依晨同鄭元暢（小綜）主演嘅台劇《惡作劇之吻》，喺2005年播出嗰陣，紅遍亞洲，事隔逾16年，《惡吻》家族於網上節目《不專業廚房》合體，仲趁住今晚播出（31日）2021年嘅最後一集，同大家一齊倒數跨年，仲會同埋林依晨隔空視像對話，一齊迎接2022年！

為咗要重現《惡吻》中一家人圍住餐枱食飯嘅經典畫面，鄭元暢特別選了菜脯蛋、四季豆、炸排骨、宮保雞丁、貢丸湯，4餸1湯嘅家常菜，但係由於趕時間同林依晨隔空連線，佢哋就愈煮愈失控，喺廚房「鬧交」，好唔容易先煮完，但係啲餸嘅賣相就唔係咁好囉，啲菜脯蛋同宮保雞丁都傳出陣陣嘅燒焦味，而小綜煮貢丸湯嗰陣連個湯包嘅包裝袋都一齊放埋落去煮，相當嚇人！唐從聖都話林依晨好幸運避過一劫，唔使食晒呢啲餸，但係小綜竟然話打算將啲餸打包帶畀林依晨食，唔係咁大整蠱嘛，好在唐從聖跳出嚟保護林依晨話：「我們把菜帶去，我們吃餐廳的菜，然後這些菜給餐廳的人吃！」