第5次爆肺！謝安琪舊年夏天曾入院一星期

歌手謝安琪（Kay）2008年11月因氣胸（俗稱爆肺）入院並接受手術，事件令唔少樂迷震驚，一直去到2016年，Kay再自爆原來曾經歷4次爆肺，爆肺後壓力大，又因為個肺唔好、控制唔到而演出失準，搞到佢日喊夜喊。點知尋日（5號）佢借紀念自己加入樂壇17周年，公開表示原來舊年夏天佢經歷人生第5次爆肺！

佢留言表示舊年完成新歌宣傳後，有一日佢突然呼吸困難、胸口鬱痛，立即安排入院檢查，點知真係爆肺，最後佢手術後住院一星期，並休息足足一個月：「休息期間是夏天，之後每一個月的覆診，是真正的『照肺』啊！肺部康復良好，就是其他健康指數一直不好…」而佢當時就覺悟到自己要學習專注康復，又專注為自己同團隊做安排及決定，慢慢就令佢「放心下來」變淡定，身體都慢慢調理番。

Kay以短訊回覆東網說：「其實係幾個月前發生嘅，依家已經好返晒，多謝大家關心，唔好意思，令大家擔心了。其實有呢個問題困擾嘅人，通常都係要小心啲嘅，因為都好常見，會再次發生，尋日我同大家講完之後，都有好多樂迷或者其他唔認識嘅網友，私訊我同我分享佢哋嘅經歷，好多都好似我咁經歷過幾次，我都有逐一回覆佢哋，大家互相鼓勵，我好多謝大家咁真誠同我溝通，好多人為我打氣，好想多謝大家對我咁多支持，今年我都會畀心機鍛煉身體，保持健康，希望大家都一樣身體健康。」