ERROR粉絲勁揼本　買巴士車身廣告為肥仔193慶生

組合ERROR早前喺叱咤頒獎禮全晚坐冷板凳，仲要慘到話成軍3周年慶祝活動自己搞，疑被ViuTV「放養」，聽落真係慘慘豬，不過唔緊要，好彩仲有一班粉絲肯出錢出力，買巴士車身廣告為同樣1月14日生日嘅193（郭嘉駿）同肥仔（梁業）慶生。兩人又係隊友，仲要係同年同月同日出世，下周齊齊踏入32歲，呢份緣分認真深！

193班「老婆」知道偶像鍾意型，就用黑底作為生日應援巴士底色，再配色彩繽紛文字，無論車身到內籠，包括司機位、椅背、電視機下、天花、樓梯位都充滿193身影，行走於街上，就猶如「漆黑中的螢火蟲」，而燈箱廣告中，「老婆」揀嘅大頭相仲有少少似韓國型男玄彬！而肥仔一班「小草」粉絲就用咗綠色為應援巴士主題，非常奪目養眼，又有清新感覺，似足肥仔咁陽光同搞笑！