拍住葛優！Baby代言北京台春晚　搣甩「流量」標籤

內地春晚舉行在即，演出嘅明星陣容向來係城中熱話，今年北京廣播電視台（北京台）春晚嘅代言人更係焦點所在，皆因每年大會都會邀請該年度最具人氣及實力嘅男星女星擔任代言人，好似2019年有楊冪及蔡徐坤，去年就有迪麗熱巴及王源，惟今年有指受內地清朗行動影響，一改起用流量偶像嘅傳統，故請來內地影帝葛優，搭檔女星Angelababy（楊穎）擔任代言人，間接認證Baby為「實力派」，給予肯定！

昨日（9日）Baby以一身紅白格仔套裝裙上陣，現身北京台春晚發布會，佢坦言自己同屋企人都好鍾意睇北京台春晚，故今次能登上舞台感到驕傲，笑言日後可向家人炫耀。此外，佢與葛優又一齊去到後台，了解幕後運作，並準備咗一袋袋冰糖葫蘆，慰勞工作人員，相當有心。