被Foul出《造星》女團　Alice發文淨係恭喜自己友？

ViuTV選秀真人騷《全民造星IV》今日（12日）公布8人女團COLLAR名單，當中就有冠、亞、季軍Marf（邱彥筒）、Gao（沈貞巧）及Day（許軼），同人氣王Ivy So（蘇雅琳）、WINKA（陳泳伽）、芯駖（李芯駖）、So Ching（蘇芷晴）及Candy（王家晴）。早前被指係女團「潛力成員」之一嘅選手許寶恆（Alice）就組團失敗，未知係咪因為佢被傳介入MIRROR成員柳應廷（Jer）同圈外女友Kelly嘅感情，形象插水而影響入圍。

雖然被Foul出COLLAR，不過Alice都好識做，即刻上載靚女相氹一班粉絲：「✨Yeah鬆一口氣lu，錫番大家，白兔糖們（粉絲暱稱）唔好失望啦！我愛大家?✨」而佢又轉發COLLAR成員宣傳照，不過就奇怪佢淨係轉發咗當中Gao、Ivy So、WINKA 3位好友嘅官方相，唔知佢係有嘢做要分批恭喜，定係只恭喜「自己友」，搞到成件事好有「弦外之音」。