竇驍做「痴漢」吸48萬人睇　何超蓮再拍片氹男友

賭王千金何超蓮近年全力攻內地市場，拍真人騷又做埋直播主持，同內地藝人男友竇驍就可以有更多時間相處，加上佢出名係跟得女友，就連竇驍拍劇佢都會跟埋去，不過依然有網友成日傳二人分手，搞到佢哋都要出招晒恩愛力證情不變。估唔到超蓮今次一連兩日都上載新片放閃，前日（13日）佢就晒出同竇驍打情罵俏嘅短片，到截稿前已有近48萬個Like，成48萬人爭住睇佢兩個放閃，數字驚人，竇驍仲被網友笑佢個樣似足「痴漢」見到女神咁！而尋日（14日）超蓮再上載成都食好西片段，一開波就先挨住男友頭貼頭自拍，用行動話畀大家聽佢兩個真係形影不離，似足孖公仔，之後成條片都隱隱約約見到男友啲衫呀、4分一塊面呀，以為佢係想介紹美食，點知原來係想大晒撐枱腳Sweet Sweet拍拖，真係睇到網友「糖尿病」呀。