陳偉霆孖Dash@Mr.貼地歎茶記　原來係吃貨！

喺呢個跟紅頂白嘅娛樂圈搵到真朋友特別難，不過樂隊Mr.結他手Dash就好好彩，因為識咗William（陳偉霆）呢個好兄弟。William曾經講過同Dash嘅關係親密到好拍拖咁，所以當Mr.工作量大減嘅時間，William就搵咗佢位「男朋友」Dash做隨圑結他手，幫佢嘅巡迴演唱會彈結他，等好兄弟搵到食之餘，又可以朝夕相對傾心事，可謂一舉兩得。

雖然近幾年，因為疫情關係，William少咗開巡迴演唱會，不過佢同Dash嘅羈絆係斬唔斷嘅。好似日前William去澳門開倒數騷，就即刻約都喺澳門嘅Dash聚舊，不過佢哋冇喺五星級酒店談情，而係去咗茶餐廳食「自助餐」，有厚西多、火腿通粉、豬扒飽，仲有香濃奶茶，任揀任食。

雖然全部都係平民嘢，但Dash就食得好開心，仲同William肩貼肩咁狂影相，而Dash仲着埋William個時裝品牌衞衣，幫好兄弟賣廣告。又有網民影到William同一位男友人買咗好多袋澳門手信走人，似乎Fit到漏嘅佢都係吃貨之人。