鄧麗欣露營當去火星　腿張開揼帳篷勁麻甩

本地疫情來勢洶洶，女星鄧麗欣（Stephy）決定要離開地球！佢今日（16日）喺社交網留言：「今日上火星，沒有地球訊號，有急事找我的...請不要急。明天回覆你。」仲甫咗幾張相，見Stephy着晒全副武裝上陣，黑超、帽、風褸、背囊，又拎住一袋二袋，其實佢只係去露營，平時靚靚女女嘅佢，麻甩上身蹲低用錘揼帳篷，對住鏡頭Chok擺甫士，有晒姿勢，但就唔知有冇實際。網友都好識做，配合Stephy，叫佢喺火星玩得開心啲，又問佢係咪去火星探「火星女孩」炎明熹，仲話Stephy手上嘅錘係雷神錘，網友真係好有想像力喎！