《聲夢傳奇》人氣王炎明熹（Gigi）及姚焯菲（Chantel）今年拍住上成為最強新人，齊齊於《新城勁爆頒獎禮2021》及《2021年度叱咤樂壇流行榜頒獎典禮》橫掃新人獎項，呢日兩位好姊妹不約而同於社交網發文，大談成為樂壇新人王嘅感受。

Gigi坦言去年嘅轉變相當不可思議，又多謝粉絲嘅支持：「我從沒想過可以出現在大家面前，以及做自己喜歡的東西並且可分享給大家。到現在都覺得很奇妙，每樣東西都順其自然發生了，翻看手機內的相簿，看見自己在慢慢的成長，漸漸的改變都挺不可思議的。之前都是只有家人朋友支持我，到現在開始累積自己的粉絲，你們風雨不改都在背後默默幫助我撐我，我知道的。」又寄語希望可以變得好似堅果一樣咁堅毅不屈。

至於Chantel則表示：「睇番上一年真係好難忘，原先只係因為鍾意唱歌而參加比賽，估唔到好幸運可以嘗試唔同嘅演出，仲有大型演唱會，同個人及組合單曲。到年底及今年年頭有新人獎，真係無諗過。」並指多謝獎項嘅鼓勵，又感激背後嘅音樂團隊及粉絲「小菲象」嘅支持。