片場飯盒曝光!楊冪食得清淡 趙麗穎分甘同味

2022年01月17日 00:02
東網電視
更多新聞短片
喺周星馳電影系列《喜劇之王》中,扮「茄哩啡」嘅佢為咗個飯盒,就畀飾演場務嘅吳孟達盡情侮辱,就知一個片場飯盒對演員嚟講有幾咁重要。咁內地兩大劇集收視女王楊冪同趙麗穎又食咩飯盒呢?
據行內人透露,楊冪被內地劇組場務列為「好藝人」,性格平易近人嘅佢喺開飯時,完全冇大明星架子,佢揀嘅飯盒同臨記食嘅差唔多,個賣相唔使太靚,亦都唔使食貴嘢,都係以素菜為主,似乎佢為咗副好身材,所以養成食得清淡嘅好習慣。
而另一位一線女星趙麗穎喺場務眼中屬「超好藝人」,因為佢食飯時,會要求喺自己嘅私人休息室度開餐,啲膳食要有營養嘅三菜一湯,不過佢唔會鍾意獨食,通常會叫埋其他演員一齊食,可能因為佢農村出身,知米飯係粒粒皆辛苦,唔想叫咗咁多餸,食唔晒就好大嘥,所以寧願同人分享,做個有衣食嘅人。
黃聖依歎滿漢全席
至於「星女郎」黃聖依,可能因為嫁咗入豪門,食慣好嘢,所以喺劇組開工時,就習慣好似開滿漢全席咁,叫埋啲餸菜又多又高檔,啲網民睇見佢餐餐都咁好餸就留言話:「闊太就是不一樣。」