為家人搬屋「私追」照跟　姜濤發火：請真的給我空間！

人氣男團MIRROR成員姜濤人氣高，因為一班粉絲成日去到銅鑼灣等見偶像，又曾買起該處多個顯眼廣告牌為博藍顏一笑，銅鑼灣變「姜濤灣」，搞到大家都知姜濤住邊。身為孝順仔嘅佢，深知家人想要更寧靜嘅生活環境，佢就選擇搬屋變獨居，不過竟然因為粉絲「私追」而令新住處瞬速遭人起底，搞到佢嬲豬咗，尋晚（17日）喺社交平台開腔狂呻：「請真的給我一點空間。」其經理人花姐（黃慧君）亦喺差不多時間於社交平台呼籲道：「感謝大家喜愛舞台上的MIRROR，在舞台下，他跟我們一樣，需要有私人空間和好好休息的時間，才能創作更多好的作品給大家，在互相尊重下，懇請大家不再進行『私追』。」

而網上流傳多張MIRROR社交網Inbox Cap圖，疑似係負責營運社交網嘅「小編」同粉絲發生罵戰，因粉絲不滿對方出Post字眼輕佻而引發雙方爭論，事後花姐亦即刻Post Story代工作人員向粉絲道歉。