小海綿生日冇合體？黃曉明Baby一件校褸兩份着證恩愛

內地男星黃曉明出POST慶祝囝囝小海綿5歲生日，但未見太太Angelababy有表示，啲網民又再剝花生，估佢哋兩公婆係咪「貌合神離」？不過另有網民就話發現咗啲嘢，可以「證明」佢哋兩公婆仲係好恩愛嘅，只係低調私人生活啫，叫啲花生友唔好諗咁多。

咁位網民又有乜「證據」支持佢嘅論點呢？原來就係一件羽絨褸。話說Baby近日同內地小鮮肉任嘉倫拍緊新戲，因為天氣太凍，唔使開機時，佢都會着住件黑色羽絨大褸保暖，而呢件羽絨褸除咗oversize，仲好似係男裝款添，有眼利友就見到件褸上繡咗「北京電影學院」幾隻字，而個款仲係「北電」冬季嘅舊版校服，由於baby冇讀過「北電」，所以啲網友就推斷，件褸應該係佢讀過嗰間學校嘅老公黃曉明嘅。

而事實上，黃曉明之前出席內地劇《鬢邊不是海棠紅》開機儀式時，的確又真係着過同款嘅「北電」羽絨校褸出嚟影相，之後仲見佢褸不離身成日着住，似乎好鍾意呢件咁有紀念價值嘅「校褸」咁喎，家陣曉明連咁鍾意嘅褸都借畀Baby着上身，斷估佢哋嘅關係應該惡劣極都有限啦。