潘瑋柏賀老婆生日甫自己相　宣云晒默契照單全收

台灣歌手潘瑋柏娶咗內地「最美空姐」宣云（Luna），二人結婚2年嚟一直都異常低調，罕見放閃，最多都係一齊出街時咁啱被斷正，估唔到佢兩個連放閃都特別過人！尋日（18日）係Luna生日，潘瑋柏循例都要晒相賀老婆，點知佢淨係晒咗自己嘅單人照同蛋糕相，老婆個影都見唔到，不過網友睇番啲留言就即刻明白晒，佢寫道：「坐我對面的你給我聽好了！忍很久了了！生日快樂啊 哈哈 ? 天天開心」仲Tag埋Luna個名，暗示生日都係一齊撐枱腳，So Sweet！

至於壽星女Luna佢就同老公一樣，都淨係晒自己單人照同切蛋糕相，默契度滿分，再細睇啲相，二人明顯係喺同一間餐廳食飯慶祝，再加埋「老公／老婆視角」，低調得嚟又放到閃，真係甜過蜜糖。加上另一張切Cake相明顯轉咗返屋企影，兩公婆由餐廳黐實到返屋企，咁識製造二人世界，唔知會唔會都好快「搞出人命」呢？