女神Kayan9896驚喜賀壽　當奴老婆咩反應？

DJ當奴（唐劍康）之前喺頒獎禮度唔掩飾對網紅Kayan9896的「愛慕」，1月18日係當奴生日，佢嘅同事特別畀個驚喜佢，搵嚟Kayan捧住生日蛋糕走入直播室賀壽星公，當奴將同事幫佢拍嘅短片放上社交平台，他寫道：「我唔係變態佬，我連佢IG都唔敢Follow囉，我真係純粹欣賞佢嘅歌，聖艾粒節目同事驚喜呢單嘢我唔會不了了之。」

片段中當奴一見到Kayan捧住蛋糕突然走入嚟，佢真係一臉鄂然：「你哋搞咩？」接住彈起身向後行，跟住就鞠躬話多謝，仲嚇到用手撥涼，同幾個同事就大聲話：「恨到啦！Kayan唱生日歌畀你聽。」但他就直認：「尷尬！」非常爆笑。

而當奴拍檔少爺占就留言爆佢料：「響佢未唱歌之前，佢已經話欣賞人哋啲歌！」游學修就接口留言：「佢自己知咩事。」當奴就搞笑不停寫道：「求吓你唔好講。」而當奴老婆Jan都有留言：「發達！」好友繼續取笑話：「唔好阻發達。」