隔離共需28日︱古佩玲恨返內地團圓：冇咁多假

藝人滕麗名、呂慧儀、周嘉洛、謝嘉怡及古佩玲等，今日（19日）下午現身電視城出席《愛．回家之開心速遞》新春宣傳活動，一班演員提早慶祝虎年，更在道具桃花樹前轉圈祈福，適逢滕麗名明日（20日）46歲生日，眾人誠心送上祝福。

謝嘉怡（Lisa）與古佩玲（Kelly）事後齊齊受訪，談到虎年將至，Lisa透露今年可一家團聚，事關父母已由蘇格蘭來港，她表示：「應該會有一、兩日放假，會返大埔同嫲嫲食飯。其實細個喺蘇格蘭農曆年氣氛唔太濃厚，記得大約10歲嗰年，有日返學老師同我講『你聽日唔使返學校喇』，原來係爸爸幫我申請咗農曆年放假幾日。」

Kelly則因家人身在深圳定居及工作，故相信農曆年未能團聚：「姪仔已1歲大，但依家淨係見過佢一次，我諗佢都唔記得咗我！希望疫情快啲過，我都有考慮過返內地同屋企人過年，但由香港返內地要隔離28日，冇咁多假。咁啱早排我病過，唯有留港爭取時間休息吓。」