瘋傳《還珠格格》3.0招聘List　要搣甩精靈小燕子？

劇集《還珠格格》自1998年播出後，就多次成為劇集翻拍對象，入面個個角色性格夠鮮明，大家都沉醉於精靈活潑嘅「小燕子」同溫柔動人嘅「紫薇」之間，令趙薇同林心如成為兩個角色最經典扮演者，即使之後嘅黃奕版本都被比下去，但坊間依然多次傳出要拍第三版嘅消息，更指想搵依家當紅嘅前火箭少女101成員楊超越及「4000年一遇美女」鞠婧禕做兩大主角。

不過原來大家都估錯晒，最近網上流傳出一份開拍《還珠格格》3.0嘅演員招聘圖，當中除咗透露咗劇名之外，仲附上一個主要演員嘅人物介紹List，根據人物小傳所指，角色設定基本同舊版《還珠格格》一致，不過劇組亦打出「重新定義六大角色」嘅標籤，即係小燕子、紫薇、五阿哥、爾康、晴兒同蕭劍，反而為人熟悉、當年由范冰冰飾演嘅「金鎖」就被飛出主角之列，擺明係想主角都搣甩舊版本嘅影子，所以隨時會打造出斯文淡定嘅「小燕子」同粗獷外向嘅「紫薇」，啱唔啱睇就真係見仁見智喇。