萬眾同心賀Edan｜Jeffrey公開胸襲照　AL小儀爭放閃

MIRROR人氣王呂爵安（Edan）今日（21日）25歲生日，受盡萬千寵愛嘅佢獲圈中好友紛紛送上祝福，但由佢出名玩得兼冇偶像包袱，令本來生日都慘成「團欺」，即眾人開玩笑嘅對象！帶頭陣嘅有《膠戰》拍檔好友Jeffrey（魏浚笙），佢喺社交網公開多張Edan嘅搞笑相，包括曾被Edan胸襲摸胸肌以及Edan戴頭套扮光頭，仲有一張Edan戴上泳鏡嘅照片，見Edan雙眼睜大、露出自信笑容，表情勁有喜感，不過Edan未有介意，仲留言：「Love u細佬！」

至於身為Edan「正印」嘅小儀當然都有出甫，佢晒出早前Edan去水上樂園玩滑水梯嘅Chok爆片段，不過都不忘留言笑佢：「靜雞雞話你聽吖：Edan，er er er......你戇居同chok都係正嘅！」而喺《大叔的愛》同Edan組成CP嘅隊友Anson Lo（盧瀚霆），就晒出2人身貼身挨到實嘅合照，趁機「放閃」！