區永權受高空擲物滋擾　天降吸塵機棍撞崩露台邊

《東張西望》主持區永權受樓上鄰居高空擲物滋擾，有人將吸塵機棍由高空擲下，更撞崩他的露台邊位，他在社交網附上圖文，慶幸當時沒有人受傷，如果姐姐晾緊衫就不堪設想，他寫道：「到底想點？只差一點點……失驚無神，騎樓傳出巨響，發現天降吸塵機棍乙支，支棍彎咗，而騎樓邊亦呈現一個大凹位，未知兩者有冇直接關係？！但肯定嘅，就係我哋非常好彩，無人中頭獎，否則後果不堪設想！只差一點點，如果當時正正係姐姐晾衫時候，咁就大劑！」

而今次並非第一次出現高空墮物，區永權續寫道：「其實我樓上嘅鄰居（唔知邊一層），間中都會天降禮物畀我哋，例如：煙頭、紙巾、螺絲、垃圾等等，但如此重擊厚禮，都係第一次！懇請樓上朋友們，高抬貴手吧！萬分感激！」

而相隔一日區永權再度受到樓上高空擲物滋擾，不過今次係裝修索帶，他無奈笑言：「今日樓上某鄰居，繼續天降「禮物」，不過已經輕手咗好多，只係裝修索帶一大堆！」#到底幾時先停手 #我屋企騎樓唔係垃圾桶 #唔通真係要搵東張西望。