趙麗穎傳首登央視春晚！溫拿五虎齊集賀虎年

每年央視春晚嘅陣容都備受關注，近日不少明星被拍得頻頻出入電視台，即盛傳為春晚進行綵排，當中內地一線花旦趙麗穎成為焦點所在，事關佢雖然出道多年人氣高企，但原來以往從未參加央視春晚，所以如果消息屬實，佢今年將會係首度登上春晚舞台，有傳演技備受肯定嘅佢，屆時更將會表演小品戲劇，直播展示演技。另一位傳出首登春晚嘅，就有台灣女星陳妍希，去年佢於《乘風破浪的姐姐2》大騷歌舞人氣急升，故外間猜測佢會於春晚舞台表演唱歌。

與此同時，有「樂壇校長」之稱嘅譚詠麟（阿倫）亦被傳係春晚嘉賓之一，雖然佢今次唔係首次上春晚，但由於對上一次參加央視春晚已係1991年演唱《水中花》，故今年可能係佢相隔31年後再一次登上央視春晚，意義非常重大，更有傳佢將會聯同溫拿亮相，「溫拿五虎」齊集賀虎年。

頸巾笠頭遮面

有傳趙麗穎等足15年首登春晚舞台，她現身電視台綵排時，疑一反親民常態，甫見鏡頭即如驚弓之鳥，奔往大堂時慌不擇路，被助手拉回又出手遮面，更索性用頸巾笠頭，相比另一位女星劉濤主動向傳媒揮手，兩位一線女星作風大相逕庭。

趙麗穎的表現被網民狂轟冇禮貌，有粉絲出面護航，指她不欲素顏曝光才閃避，可惜仍遏止不了罵聲，唯獨帶挈網店提早發新年財，有指她當「遮醜布」用、價值約200元的大頸巾，被粉絲於5分鐘內搶到斷市。