陶大宇被「大小姐」力邀　隨時《愛．回家》！

藝人陶大宇因為翻唱一曲《倒轉地球》已紅遍內地，大家日日學佢跳水撥舞，最近佢返咗香港，即刻被「娘家」TVB《東張西望》捉住訪問，毫無架子嘅佢就現身電視城，即引嚟多位曾合作嘅藝員好友上前攬攬兼集郵，人緣非常好！

訪問一開始，陶大宇就被「視后阿妹」唐詩詠衝入鏡頭要求合照，原來二人早年曾合作劇集《心花放》演兄妹，唐詩詠見到佢就即刻上前攬到唔肯放手，成個小粉絲咁偈都唔傾，要合照咗先。之後「大小姐」林淑敏同「送水輝」許家傑路過，二人邊跳邊唱《倒轉地球》夾擊，搞到陶大宇都勁興奮咁「左擁右抱」，又自爆當年得到林淑敏鼓勵非常感動，更直言有睇開《愛．回家之開心速遞》，連「大小姐」同「送水輝」結咗婚都知，難怪二人都要捉住佢，要佢答應客串《愛回家》，見陶大宇冇Say No，唔通嚟緊真係有機會見到佢現身？

《愛》劇監製林建祥接受東網訪問，被問到會否邀請陶大宇客串演出，他說有留意陶大宇在《東》的訪問，覺得不錯及好得意，又說不排除合作：「我唔知大宇哥個期點，隨緣啦！」