張繼聰疫下日日陪仔女讀書：自己好似讀緊K2咁！

藝人張繼聰與陳湛文今晚（24日）出席主演的賀歲片記者會，對於現時戲院暫時關閉至初三，問到會否擔心關閉期延長令電影上映遙遙無期？張繼聰坦言沒有辦法：「除咗擔心之外，都要調整心態，開朗啲，我就有少少經驗，因為上年我都有部賀歲片，受到疫情影響要年初七先上到。」陳湛文稱電影若能在2月14情人節上映也不錯。

至於可有因電影延期而打亂原定計劃？張繼聰表示學懂見步行步及活在當下，問到農曆新年如果度過？他說：「拜年嘅日子好似好耐之前咁，冇得拜年變成常態，工作係有少少影響，不過呢兩年多咗時間陪伴小朋友成長，最近小朋友網上上課，我日日陪佢上堂同對功課，雖然我唔使返工，但要返學，工作量反而大咗，好似自己讀緊K2咁。」陳湛文表示多了時間幫手湊小朋友，現時已開始為小朋友報讀N班而煩惱。