港星稱霸春晚！容祖兒領軍進場　張衞健創新經典

內地春晚向來係各電視台嘅年度盛事，表演陣容令人期待，今年廣東衛視以大灣區作為主題，請來多位香港紅星，包括天后容祖兒（Joey）、張衞健、組合Twins、關智斌（Kenny）及林曉峰等，節目日前更正式公開表演項目，其中Joey作為重量級開場嘉賓，率領孫楠、Kenny等藝人坐住無人機及無船登上舞台，排場十足，緊接Joey即以快歌《亞亞亞》炸爆舞台，Joey表示今次選擇演唱呢首歌曲，全因正正係佢奮鬥嘅寫照：「只要願意追隨自己的目標，你就是人生的大贏家。」

至於憑節目《追光吧！》人氣急升嘅張衞健就將經典粵劇《分飛燕》融合影視金曲《鐵血丹心》，更大膽用交響樂重新演繹戲曲，張衞健表示：「從來沒有嘗試過將流行歌曲和粵劇做一個交融碰撞，這次很興奮，也為自己是大灣區一分子感到光榮。」而去年因節目《披荊斬棘的哥哥》大受歡迎嘅林曉峰，更係首次以嘉賓主持身份亮相春晚，期間佢仲同內地歌手薛之謙一唱一和搞爛Gag，炒熱現場氣氛。