曾奪金馬男配︱納豆腦出血送院引流　兩日前曾預言中風

曾奪金馬獎最佳男配角嘅台灣藝人林郁智（納豆）尋日（24日）驚爆腦出血並送醫開刀，雖然其經理人曾澄清稱佢係「例行性檢查」，到咗今日（25日）其經理人發聲明，表示「昨日一月二十四日早上納豆頭痛不適，與女友陳依依一同坐計程車前往醫院做檢查，醫生在診斷時發現納豆腦壓過高、並有出血症狀，經由納豆本人及家屬評估後便安排引流手術，手術過程順利，目前正在醫院休養中，並無生命危險。」消息震驚全台灣。

而納豆早喺23日就已經「預言」自己中風一事，佢被網友發現前日喺社交網回答問題：「另一半做甚麼事會讓你心跳加速？」納豆就留言「中風」並附上笑到喊表情符號，點估到佢一語成讖。