COLLAR智慧擔當破功！Candy左右鞋掉轉着遭全城恥笑

ViuTV新女團COLLAR人氣爆燈，成軍12日即接下首個代言廣告，昨日（24日）更現身簽約發布會，成為全城熱話。其中活動結束後6小時，有網民發現團中嘅「智慧擔當」Candy（王家晴）竟然將波鞋左右掉轉着，仲要遲遲不知情，直至有網友提醒，Candy先「一言驚醒夢中人」，佢笑言：「你唔講我都唔知」。被爆着錯鞋後，Candy即被隊友嘲笑，佢指：「我畀佢哋恥笑咗好耐，雖然真係幾好笑，智慧擔當今日失策了。」又死撐表示：「人體實驗之對鞋好唔好着：掉轉着去跳舞，事實證明我今次嘅實驗好成功！」並解釋因冇食早餐，搞到頭暈眼花先出錯。