老婆識隱身︱靚靚扮工作人員　張智霖全程當冇到

男神張智霖（Chilam）同老婆袁詠儀（靚靚）近年靠夫妻檔上位，喺內地大受歡迎，賺錢賺到手軟，佢哋最近又再喺內地綜藝節目《大灣仔的夜》現身，同一班「大灣區哥哥」陳小春、梁漢文、謝天華同林曉峰合作，當中仲有譚詠麟、鍾鎮濤做嘉賓，而一向視譚詠麟為偶像嘅靚靚，就決定假扮成工作人員，為見偶像一面。

靚靚一聽到譚詠麟要上老公嘅節目，為咗把握機會見偶像，佢偽裝成工作人員潛入大灣仔餐廳，頭戴Cap帽、口罩加埋拎住個Camera，過程中佢仲喺譚詠麟、鍾鎮濤面前走過，大家完全冇發現異樣，就連Chilam都冇察覺到佢嘅存在，成功騙到所有人。事後節目組問番Chilam，佢就大讚老婆隱身術厲害：「我沒有發現，沒想到她的隱身術那麼厲害。」